سایوں کا تعاقب: ہجوم کے سراب سے نائیر جرنلزم کے اسرار تک

 

سایوں کا تعاقب: ہجوم کے سراب سے نائیر جرنلزم کے اسرار تک

تحریر : علی رضا 

تحریر کا دورانیہ: 4 منٹ

زندگی کے کئی ماہ و سال میں نے اس غلط فہمی میں گزار دیے کہ ہجوم میری طاقت ہے، ان گنت چہروں کے درمیان خود کو محفوظ پا کر میں نے سمجھا تھا کہ یہ سب میرے اپنے ہیں لیکن جب زندگی کا سورج ڈھلنے لگا اور سائے دیواروں پر دراز ہونے لگے تو حقیقت کا سرد احساس میری ہڈیوں تک اتر گیا، مجھے ادراک ہوا کہ جن کندھوں کو میں نے اپنی ڈھال مانا تھا وہ تو میری اصل کمزوری نکلے، اسی لمحے میں نے کسی شکوے کے بغیر اس شور سے ناطہ توڑ لیا اور خاموشی سے اس بھیڑ سے جدا ہو کر ایک ایسے راستے پر نکل پڑا جہاں صرف میں تھا اور میری تنہائی تھی۔

جب تنہائی کے بادل ضرورت سے زیادہ گہرے ہونے لگے تو میں نے خلا میں گرنے کے بجائے اپنے موبائل کے کی بورڈ سے رشتہ جوڑ لیا اور ٹیکنالوجی کا ہاتھ تھامے لکھنے پڑھنے کی ایک ایسی کائنات میں قدم رکھا جہاں ہر لفظ ایک نیا در وا کرتا تھا، جب بھی میں کچھ لکھنے بیٹھتا تو بچپن میں پڑھے گئے وہ ڈائجسٹ اور جاسوسی کہانیاں میری یادداشت پر دستک دینے لگتیں اور ان کہانیوں کے سحر نے مجھے نائیر جرنلزم کے راستے پر ڈال دیا جہاں کہانی کو بیان کرنے کا انداز پراسرار ہوتا ہے، میرا مقصد خبر کو سنسنی بنا کر اچھالنا نہیں بلکہ اسے اسرار کے ان پردوں میں پیش کرنا ہے جہاں پڑھنے والا خود ایک ایک تہہ کو کھول کر سچ تک پہنچے، میں ایسی کہانیاں بنتا ہوں جو ماضی کے کسی گمشدہ قصے کو حال کی تلخ خبر سے جوڑ دیتی ہیں، یہاں شور مچانے کے بجائے خاموشی سے اپنی بات کہنے کا فن سیکھا جاتا ہے اور یہی میری اصل جدوجہد ہے جو ایک خاموش بھیڑیے کی طرح اپنے صحیح وقت کے انتظار میں جاری ہے۔